【執屋革命】低成本整理雜物三大要訣

購物使人快樂，快樂嘅事情做多亦無妨。但快樂過後先發現屋企已經無晒位擺嘢，不如為屋企嚟一場「執屋革命」！用低成本嘅方法執整齊間屋，間屋整齊啲，人都醒神啲！叫埋班Friend上嚟玩都唔怕招呼唔到。

1. 分割法

執屋第一要訣 — 「分割法」！分割法可以由劃分屋企空間再細割到家居物品類別，為求建立一個有系統嘅收納環境。

劃分屋企空間主要彌清番客廳、飯廳、玄關、工作空間等，收納整理嘅時候都可以逐區逐區咁做，有目標地整理會更有成就感！

當你分好點樣利用屋企每個空間，就可以循生活動線去執家居物品，例如遙控器、充電線要放回客廳同飯工作空間；雨遮、衣物消毒噴霧應放係玄關或者大門附近。

將物品分門別類之後，唔好再畀佢哋「踩過界」，要養成用完放返原位嘅習慣，保持恆常分類，咁就可以Keep住屋企整齊！

2. 「751法則」

成功分類整理之後，就可以試吓套用「751法則」。呢個法則係由日本收納女王—山下英子所提出，當中嘅「751」係指：

「看不見的收納」為 7 成

衣櫃、櫃桶、廚櫃呢啲經常係「看不見」嘅重災區，大家成日都會將諗唔到擺邊嘅嘢就咁塞入櫃桶，「閂埋就當睇唔到」，往往就係塞到滿晒而拎唔到深處嘅嘢，就慢慢唔記得咗入面擺過咩，未有善用空間同件物品。

「看不見」嘅收納空間最好只放7成滿，保持空間嘅流動性，當有新物品增加都會因為預留嘅3成空間而變得更容易會存放。

「看得見的收納」為 5 成

層架、桌上收納架等開放式儲物空間，而且呢啲位置多數係放較常用嘅物品，如化妝品、文具、鞋、手袋等，輕易就一眼睇晒上面擺咩就更加需要「留白」。收納女王建議只放滿5成，同樣係保持空間嘅流動性而且令到視覺上可以取得更好平衡，屋企空間都感覺闊落好多。

「展示型收納」為 1 成

最後畀返1成空間自己展示收藏品。呢種提倡係利用咗美術館展示藝術品嘅概念，係寛闊嘅空間只放一兩件擺設，就會有畫龍點睛嘅效果。例如係牆身掛上旅行時買嘅畫，點綴返全屋；又或者擺幾盆植物係客廳增添生氣。

3. 輕「斷捨離」

「斷捨離」呢個term真係超級盛行，但又有幾多人真係可以做到極簡斷捨離呢？所以小編都係建議大家要「適當地」進行。早排盛行嘅「333法則」（3秒決定衣服去留，3年以上無用過嘅物品，3個令你猶豫嘅藉口）就切合到輕斷捨離嘅標準。

以上3種標準就可以幫你判斷到個件物品嘅常用或者重要程度。試想像打開衣櫃，望到好多已經唔on trend嘅款式、擺到發黃嘅T-Shirt已經可以狠心放棄；同朋友聚會已經玩厭嘅桌遊都可以放上二手平台出售。

好好篩選屋企嘅物品可以令你屋企好好實行「保持流通性」一法。

「執屋仲有好多嘢，幾個箱先夠用？」

⇢ 立即報價

（執屋搵幫手：【鐘點清潔】想搵到好幫手做全屋清潔？鐘點可以幫到你！）

執屋「一TAKE過」，生活無煩惱！

學識執屋三大要訣之後就要付諸實行，我都明白執屋係一件好攰嘅事，但革新屋企一次就知道間屋原來係咁多生活空間，所有嘢分類擺先發現好多嘢買完又買，就例如會搵到一枝又一枝嘅潤唇膏，日日搽都搽唔切呀。仲有仲有，小編強烈建議將書、相簿、畫作呢啲有意義但唔常用嘅存入倉，咁就唔怕執嚟執去間屋都係咁多嘢啦，又可以Keep住環境整齊。